ನಾರಾಯಣನ ನೆನೆ ಮನವೇ | ಹಯವದನ | Narayanana Nene Manave | Hayavadana

ಸಾಹಿತ್ಯ : ಶ್ರೀ ವಾದಿರಾಜರು (ಹಯವದನ)

Kruti:Sri Vadirajaru (Hayavadana)

ನಾರಾಯಣನ ನೆನೆ ಮನವೇ ನಾರಾಯಣನ ನೆನೆ || ಪ ||

ನಾರಾಯಣನ ಮನ್ನಿಸು ವರ್ಣಿಸು| ಆರಾಧನೆಗಳ ಮಾಡುತ ಪಾಡುತ| 

ನೀರಾಜನದಿಂದ ಅರ್ಚಿಸು ಮೆಚ್ಚಿಸು ಪಾರಾಯಣ ಪ್ರಿಯನ || ಅಪ ||

ಲೋಕದಿ ವರಂ ವರಯೆ ಭದ್ರಂತೆ ಋತೇ ಕೈವಲ್ಯ ಮಹಾತ್ಮನಃ 

ಏಕಮೇವೇಶ್ವರ ತಸ್ಮಾದ್ ಭಗವಾನ್ ಶ್ರೀವಿಷ್ಣುರವ್ಯಯಃ ಎಂಬ|

ಈ ಕಲಿಯುಗದಿ ಬೇಕಾದ ಪುರಾಣದಿ ವಾಕು ವಿವೇಕವ ಮನದಿ ವಿಚಾರಿಸಿ|

ಸ್ವೀಕರಿಸು ವೈಷ್ಣವ ಮತವ ಜೀವ ನಿರಾಕರಿಸನ್ಯ ಮತವ ||೧||

ಆವನ ಶ್ರವಣ ಮನನ ನಿಧಿಧ್ಯಾಸನ| ಆ ವಿಷ್ಣುವಿನ ಭಕ್ತಿ ಮಹಾ ಪ್ರಸಾದಂಗಳು|

ಕೈವಲ್ಯ ಪದಕೆ ಇಕ್ಕಿದ ನಿಚ್ಚಣಿಕೆಂದು ಭಾವಜ್ಞರು ಪೇಳ್ವರು|

ಜೀವನ ಜವನ ಬಾಧೆಗಳನ್ನು ತಪ್ಪಿಸಿ| ಪಾವನ ವೈಕುಂಠ ಪುರದೊಳಗೆಂದೆಂದು

ಆವಾಸನ ಮಾಡಿ ಸುಖಿಸಬೇಕಾದರೆ| ಸೇವಿಸು ವೈಷ್ಣವರ ||೨||

ದ್ವಾರಾವತಿಯ ಗೋಪಿ ಚಂದನದಿಂದ| ಶ್ರೀರಮಣನ ವರ ನಾಮವ ನೆನೆದೆರಡಾರು

ಊರ್ಧ್ವ ಪುಂಡ್ರಗಳ ಧರಿಸೆಂದು ವೀರ ವೈಷ್ಣವ ಗುರುವ|

ಸೇರಿ ಸಂತಪ್ತ ಸುದರುಶನ ಶಂಖವ ಧಾರಣವನು ಭುಜಯುಗದೊಳು ಮಾಡಿ

ಮುರಾರಿಯ ಮಂತ್ರಗಳ ಅವರಿಂದಲಿ ಕೇಳಿ ಓರಂತೆ ಜಪಿಸುತಲಿ ||೩||

ಕಂದ ಬಾರೆಂದರೆ ನಂದನಿಗೊಲಿದಿಹ| ಕುಂದು ಕೊರತೆ ಬಂದರೆ ನೊಂದುಕೊಳ್ಳನು

ಇಂದಿರೆಯರಸ ಮುಕುಂದನೆ ಮುಕುತಿಯಾನಂದವನೀವ ದೇವ|

ಸಂದೇಹವಿಲ್ಲದೆ ಒಂದೆ ಮನದಿ ಗೋವಿಂದನ ನೆನೆದ ಗಜೇಂದ್ರನಿಗೊಲಿದ ಉಪೇಂದ್ರನ 

ಶುಭಗುಣಸಾಂದ್ರನ ಯದುಕುಲಚಂದ್ರನ ವಂದಿಸಿರೋ ||೪||

ತುಷ್ಟನಹನು ಎಳ್ಳಷ್ಟು ಮುಂದಿಟ್ಟರೆ| ಅಷ್ಟಿಷ್ಟು ಎನ್ನದೆ ಸಕಲೇಷ್ಟಂಗಳ|

ಕೊಟ್ಟು ಕಾವನು ಶಕ್ರನಿಗೆ ತ್ರಿವಿಷ್ಟವ| ಪಟ್ಟವ ಗಟ್ಟಿದವ

ನಿಷ್ಟುರನಲ್ಲ ವಿಶಿಷ್ಟರಿಗೊಲಿದಿಹ ದುಷ್ಟರ ತರಿದಟ್ಟಿದ ಜಗಜಟ್ಟಿ ಅರಿಷ್ಟ

ಮುಷ್ಟಿಕಾದ್ಯರ ಹುಡಿಗುಟ್ಟಿದ ವಿಠ್ಠಲ ಬಲು ದಿಟ್ಟ ||೫||

ಆವನ ಪಕ್ಷ ಬಲಕ್ಕಿದಿರಿಲ್ಲ ಕೇಳಾವನ ಕುಕ್ಷಿಯೊಳಕ್ಕು ಜಗತ್ರಯ|

ಆವನು ರಕ್ಷಿಪ ಶಿಕ್ಷಿಪನೋ ಮತ್ತಾವನು ಪಾವನನೋ ಆವನ ಶಿಕ್ಷೆಗೆ ಮಿಕ್ಕವರಿಲ್ಲ|

ಕೇಳಾವನುಪೇಕ್ಷೆ ಕುಲಕ್ಷಯವೆನಿಪುದು| ಆವನುರುಕ್ರಮ ವಿಕ್ರಮನೆನಿಸಿದಾ ದೇವನಿಗಾವನೆಣೆಯೇ ||೬||

ಓಡುವ ಅಡಗುವ ದೇವರೆ ಬಲ್ಲರು| ಕೂಡುವ ನೋಡುವ ಮುಕುತರೆ ಬಲ್ಲರು|

ಬೇಡುವ ಮುನಿಗಳೆ ಬಲ್ಲರು ಅವನೊಡನಾಡುವ ರಮೆ ಬಲ್ಲಳು|

ಊಡುವ ಪಾಡುವ ಯಶೋದೆ ಬಲ್ಲಳು ಕಾಡುವ ಖೂಳರ ಆಡುತ

ಕೆಡಳಿಂನಾಡೊಳು ಶರಣರ ಕೇಡು ಕಳೆವ ಕೃಷ್ಣಗೀಡೆನ್ನದಿರು ಮೂಢ ||೭||

ಹರಿ ನಿರ್ಮಾಲ್ಯವ ಶಿರದಿ ಧರಿಸುತಿರು ಹರಿ ನೈವೇದ್ಯವ ಭುಂಜಿಸುತಿರು ನಿತ್ಯ|

ಇರುಳು ಹಗಲು ಹರಿ ಸ್ಮರಣೆಯ ಬಿಡದಿರು ದುರುಳರ ಕೂಡದಿರು|

ಹರಿ ಪದ ತೀರ್ಥವ ಬಿಡದಿರು ನಿತ್ಯ ಹರಿ ಪರದೇವತೆ ಎಂದೊದರುತಲಿರು|

ಗುರುಮುಖದಿಂದ ಸಚ್ಛಾಸ್ತ್ರ ಪುರಾಣವ ನಿರುತದಿ ಕೇಳುತಿರು ||೮||

ಸಿರಿದೇವಿಯಾವನಿಗರಸಿ ಸುರರ ಗುರು| ವಿರಿಂಚಿ ಪವನರು ಆವನ ಕುವರರು|

ಉರಗಾಧಿಪನಾವನ ಮಂಚ ವಿಹಗೇಶ್ವರನಾವನ ವಾಹನ|

ಪುರಹರನಾವನುಂಗುಟ ನೀರ ಪೊತ್ತ ನಿರ್ಜರ ಪತಿಯಾವನ ಚರಣ ಸೇವಕನಾದ|

ಸುರರೊಳಗಾ ಹಯವದನಗಿನ್ನಾರನು ಸರಿಯೆಂದುಸುರುವೆನಯ್ಯ ||೯||

nArAyaNana nene manavE nArAyaNana nene || pa ||

nArAyaNana mannisu varNisu| ArAdhanegaLa mADuta pADuta| 

nIrAjanadiMda arcisu meccisu pArAyaNa priyana || apa ||

lOkadi varaM varaye BadraMte RutE kaivalya mahAtmanaH 

EkamEvESvara tasmAd BagavAn SrIviShNuravyayaH eMba|

I kaliyugadi bEkAda purANadi vAku vivEkava manadi vicArisi|

svIkarisu vaiShNava matava jIva nirAkarisanya matava ||1||

Avana shravaNa manana nidhidhyAsana| A viShNuvina Bakti mahaa prasAdaMgaLu|

kaivalya padake ikkida niccaNikeMdu BAvaj~jaru pELvaru|

jIvana javana bAdhegaLannu tappisi| pAvana vaikuMTha puradoLageMdeMdu

AvAsana mADi suKisabEkAdare| sEvisu vaiShNavara ||2||

dvArAvatiya gOpi caMdanadiMda| SrIramaNana vara nAmava nenederaDAru

Urdhva puMDragaLa dhariseMdu vIra vaiShNava guruva|

sEri saMtapta sudaruSana SaMKava dhAraNavanu BujayugadoLu mADi

murAriya maMtragaLa avariMdali kELi OraMte japisutali ||3||

kaMda bAreMdare naMdanigolidiha| kuMdu korate baMdare noMdukoLLanu

iMdireyarasa mukuMdane mukutiyAnaMdavanIva dEva|

saMdEhavillade oMde manadi gOviMdana neneda gajEMdranigolida upEMdrana 

shubhaguNasAMdrana yadukulachaMdrana vaMdisirO ||4||

tuShTanahanu eLLaShTu muMdiTTare| aShTiShTu ennade sakalEShTaMgaLa|

koTTu kAvanu Sakranige triviShTava| paTTava gaTTidava

niShTuranalla vishiShTarigolidiha duShTara taridaTTida jagajaTTi ariShTa

muShTikAdyara huDiguTTida viThThala balu diTTa ||5||

Avana pakSha balakkidirilla kELAvana kukShiyoLakku jagatraya|

Avanu rakShipa SikShipanO mattAvanu pAvananO Avana SikShege mikkavarilla|

kELAvanupEkShe kulakShayavenipudu| Avanurukrama vikramanenisidA dEvanigAvaneNeyE ||6||

ODuva aDaguva dEvare ballaru| kUDuva nODuva mukutare ballaru|

bEDuva munigaLe ballaru avanoDanADuva rame ballaLu|

UDuva pADuva yaSOde ballaLu kADuva KULara ADuta

keDaLiMnADoLu SaraNara kEDu kaLeva kRuShNagIDennadiru mUDha ||7||

hari nirmAlyava Siradi dharisutiru hari naivEdyava BuMjisutiru nitya|

iruLu hagalu hari smaraNeya biDadiru duruLara kUDadiru|

hari pada tIrthava biDadiru nitya hari paradEvate eMdodarutaliru|

gurumuKadiMda sacCAstra purANava nirutadi kELutiru ||8||

siridEviyAvanigarasi surara guru| viriMchi pavanaru Avana kuvararu|

uragAdhipanAvana maMca vihagESvaranAvana vAhana|

puraharanAvanuMguTa nIra potta nirjara patiyAvana caraNa sEvakanAda|

suraroLagA hayavadanaginnAranu sariyeMdusuruvenayya ||9||