ತಿರುಪತಿ ವೇಂಕಟರಮಣ ನಿನಗೇತಕೆ ಬಾರದು ಕರುಣ ||ಪ||
ನಂಬಿದೆ ನಿನ್ನಯ ಚರಣ ಪರಿಪಾಲಿಸಬೇಕೋ ಕರುಣಾ ||ಅ ಪ||
ಅಳಗಿರಿಯಿಂದಲಿ ಬಂದ ಸ್ವಾಮಿ ಅಂಜನ ಗಿರಿಯಲಿ ನಿಂದ
ಕೊಳನೂದುವುದೇ ಚೆಂದ ನಮ್ಮ ಕುಂಡಲರಾಯ ಮುಕುಂದ ||೧||
ಬೇಟೆಯಾಡುತ ಬಂದ ಸ್ವಾಮಿ ಬೆಟ್ಟದ ಮೇಲೆ ನಿಂದ
ವೀಟುಗಾರ ಗೋವಿಂದ ಅಲ್ಲಿ ಜೇನು ಸಕ್ಕರೆಯನು ತಿಂದ ||೨||
ಮೂಡಲ ಗಿರಿಯಲಿ ನಿಂತ ಮುದ್ದು ವೇಂಕಟಪತಿ ಬಲವಂತ
ಈಡಿಲ್ಲ ನಿನಗೆ ಶ್ರೀಕಾಂತ ಈರೇಳು ಲೋಕಕೆ ಅನಂತ ||೩||
ಆಡಿದರೆ ಸ್ಥಿರವಪ್ಪ ಅಬದ್ದಗಳಾಡಲು ಒಪ್ಪ
ಬೇಡಿದ ವರಗಳನಿಪ್ಪ ನಮ್ಮ ಮೂಡಲ ಗಿರಿಯ ತಿಮ್ಮಪ್ಪ ||೪||
ಅಪ್ಪವು ಅತಿರಸ ಮೆದ್ದ ಸ್ವಾಮಿ ಅಸುರರ ಕಾಲಲಿ ಒದ್ದ
ಸತಿಯರ ಕೂಡಾಡುತಲಿದ್ದ ಸ್ವಾಮಿ ಸಕಲ ದುರ್ಜನರನು ಗೆದ್ದ ||೫||
ಬಗೆ ಬಗೆ ಭಕ್ಷ್ಯ ಪರಮಾನ್ನ ನಾನಾ ಬಗೆಯ ಸಕಲ ಶಾಲ್ಯಾನ್ನ
ಬಗೆ ಬಗೆ ಸೊಬಗು ಮೋಹನ್ನ ನಮ್ಮ ನಗೆಮುಖದ ಸುಪ್ರಸನ್ನ ||೬||
ಕಾಶೀ ರಾಮೇಶ್ವರದಿಂದ ಅಲ್ಲಿ ಕಾಣಿಕೆ ಬರುವುದೇ ಚೆಂದ
ದಾಸರ ಕೂಡೆ ಗೋವಿಂದ ಅಲ್ಲಿ ದಾರಿ ನಡೆವುದೇ ಚೆಂದ ||೭||
ಎಲ್ಲ ದೇವರ ಗಂಡ ಅವ ಚಿಲ್ಲರೆ ದೈವದ ಮಿಂಡ
ಬಲ್ಲಿದವರಿಗೆ ಉದ್ದಂಡ ಶಿವ ಬಿಲ್ಲ ಮುರಿದ ಪ್ರಚಂಡಾ ||೮||
ಕಾಸು ತಪ್ಪಿದರೆ ಪಟ್ಟಿ ಬಡ್ಡಿ ಕಾಸು ಬಿಡದೆ ಗಂಟು ಕಟ್ಟಿ
ದಾಸನೆಂದರೆ ಬಿಡಗಟ್ಟಿ ನಮ್ಮ ಕೇಸಕ್ಕಿ ತಿಮ್ಮಪ್ಪಸೆಟ್ಟಿ ||೯||
ದಾಸರ ಕಂಡರೆ ಪ್ರಾಣ ತಾ ಧರೆಯೊಳಗಧಿಕ ಪ್ರವೀಣ
ದ್ವೇಷಿಯ ಗಂಟಲಗಾಣ ನಮ್ಮ ದೇವಗೆ ನಿತ್ಯ ಕಲ್ಯಾಣ ||೧೦||
ಮೋಸ ಹೋಗುವವನಲ್ಲಯ್ಯಾ ಒಂದು ಕಾಸಿಗು ಒಡ್ಡುವ ಕೈಯ್ಯ
ಏಸುಮಹಿಮೆಗಾರನಯ್ಯಾ ನಮ್ಮ ವಾಸುದೇವ ತಿಮ್ಮಯ್ಯಾ ||೧೧||
ಚಿತ್ತಾವಧಾನ ಪರಾಕು, ನಿನ್ನ ಚಿತ್ತದ ದಯವೊಂದೆ ಸಾಕು
ಸತ್ಯವಾಹಿನಿ ನಿನ್ನ ವಾಕು, ನೀನು ಸಕಲ ಜನರಿಗೆ ಬೇಕು ||೧೨||
ಅಲ್ಲಲ್ಲಿ ಪರಿಷೆಯ ಗುಂಪು, ಮತ್ತಲ್ಲಲ್ಲಿ ತೋಪಿನ ತಂಪು
ಅಲ್ಲಲ್ಲಿ ಸೊಗಸಿನ ಸೊಂಪು, ಮತ್ತಲ್ಲಲ್ಲಿ ಪರಿಮಳದಿಂಪು ||೧೩||
ಅಲ್ಲಲ್ಲಿ ಜನಗಳ ಕೂಟ ಮತ್ತಲ್ಲಲ್ಲಿ ಬ್ರಾಹ್ಮಣರೂಟ
ಅಲ್ಲಲ್ಲಿ ಪಿಡಿದ ಕೋಲಾಟ, ಮತ್ತಲ್ಲಿಂದ ಊರಿಗೆ ಓಟ ||೧೪||
ಪಾಪನಾಶಿನಿ ಸ್ನಾನ ಹರಿ ಪಾದೋದಕವೇ ಪಾನ
ಕೋಪ ತಾಪಗಳ ನಿಧನ ನಮ್ಮ ಪುರಂದರ ವಿಠಲನ ಧ್ಯಾನ ||೧೫||
tirupati vEMkaTaramaNa ninagEtake baaradu karuNa ||pa||
naMbide ninnaya caraNa paripaalisabEkO karuNaa ||a pa||
aLagiriyiMdali baMda svaami aMjana giriyali niMda
koLanUduvudE ceMda namma kuMDalaraaya mukuMda ||1||
bETeyaaDuta baMda svaami beTTada mEle niMda
vITugaara gOviMda alli jEnu sakkareyanu tiMda ||2||
mUDala giriyali niMta muddu vEMkaTapati balavaMta
IDilla ninage shrIkaaMta IrELu lOkake anaMta ||3||
ADidare sthiravappa abaddagaLaaDalu oppa
bEDida varagaLanippa namma mUDala giriya timmappa ||4||
appavu atirasa medda svaami asurara kaalali odda
satiyara kUDaaDutalidda svaami sakala durjanaranu gedda ||5||
bage bage bhakShya paramaanna naanaa bageya sakala shaalyaanna
bage bage sobagu mOhanna namma nagemuKada suprasanna ||6||
kaashI raamEshvaradiMda alli kaaNike baruvudE ceMda
daasara kUDe gOviMda alli daari naDevudE ceMda ||7||
ella dEvara gaMDa ava cillare daivada miMDa
ballidavarige uddaMDa shiva billa murida pracaMDaa ||8||
kaasu tappidare paTTi baDDi kaasu biDade gaMTu kaTTi
daasaneMdare biDagaTTi namma kEsakki timmappaseTTi ||9||
daasara kaMDare praaNa taa dhareyoLagadhika pravINa
dvEShiya gaMTalagaaNa namma dEvage nitya kalyaaNa ||10||
mOsa hOguvavanallayyaa oMdu kaasigu oDDuva kaiyya
Esumahimegaaranayyaa namma vAsudEva timmayyaa ||11||
cittaavadhaana paraaku, ninna cittada dayavoMde saaku
satyavaahini ninna vaaku, nInu sakala janarige bEku ||12||
allalli pariSheya guMpu, mattallalli tOpina taMpu
allalli sogasina soMpu, mattallalli parimaLadiMpu ||13||
allalli janagaLa kUTa mattallalli braahmaNarUTa
allalli piDida kOlaaTa, mattalliMda Urige OTa ||14||
paapanaashini snaana hari paadOdakavE paana
kOpa taapagaLa nidhana namma puraMdara viThalana dhyaana ||15||
