ಸೋಮಶೇಖರ ತಾನೆ ಬಲ್ಲ | ಸಿರಿಕೃಷ್ಣ | Somashekhara tane balla | Sri Vyasarajaru

ಸಾಹಿತ್ಯ :    ಶ್ರೀ ವ್ಯಾಸರಾಜರು  (ಶ್ರೀ ಕೃಷ್ಣ)

Kruti: Sri Vyasarajaru (Sri Krishna)

ಸೋಮಶೇಖರ ತಾನೆ ಬಲ್ಲ ಶ್ರೀ-

ರಾಮನಾಮಾಮೃತ ಸವಿಯನೆಲ್ಲ||ಪ||

ಮದನಪಿತ ಎಂದು ಕುಣಿಕುಣಿದಾಡಲು

ಕೆದರಿದ ಕೆಂಜೆಡೆಗಳ ಪುಂಜದಿ

ಒದಗಿದ ಗಂಗೆ ತುಂತುರು ಹನಿಗಳ ಕಂಡು

ಪದುಮಜಾಂಡಹಿತ ರಾಮರಾಮ ಎಂಬ|೧||

ಆನಂದ ಜಲದ ಸೋನೆಗೆ ಲಲಾಟದ

ನೇತ್ರ ಬಡಬಾನಲನಂತಿರೆ

ಏನೆನ್ನಲಿಬಹುದು ಸುಖ ಸಾಗರದೊಳು

ತಾನೆದ್ದು ಮುಳುಗುತ ರಾಮ ರಾಮ ಎಂಬ||೨||

ಶಿರದ ಗಂಗೆಯ ವರ ಅಗ್ಗಣಿಯಾಗಿರೆ

ಸರಸಿಜ ಬಾಂಧವ ಚೆಂದಿರ ದೀಪ

ಉರಿಗಣ್ಣಿನ ಹೊಗೆ ಧೂಪವನೇರಿಸಿ

ಕರಣವೆ ನೈವೇದ್ಯಯೆಂದು ರಾಮರಾಮ ಎಂಬ||೩||

ಚಂದದ ಸ್ಫಟಿಕದ ಕರಡಿಗೆಯಲ್ಲಿಪ್ಪ

ಇಂದ್ರನೀಲದ ಚೆನ್ನಪುತ್ಥಳಿಯಂತೆ

ಚಂದದಿ ತನ್ನಯ ಹೃದಯ ಮಧ್ಯದಿ ರಾಮ-

ಚಂದ್ರ ಹೊಳೆಯೆ ಶ್ರೀರಾಮರಾಮ ಎಂಬ||೪||

ಐದು ಮುಖಗಳಿಂದ ಹರಿಯ ಕೊಂಡಾಡಲು

ಸ್ವಾಧೀನ ಭೂಷಣ ಫಣಿಗಳೆಲ್ಲ

ಮೋದದಿಂದಾಡಲು ಫಣಿ ಮಣಿಯಾಘಾತ

ನಾದ ತಾಳವಾಗೆ ರಾಮ ರಾಮ ಎಂಬ||೫||

ಒಮ್ಮೆ ಹರಿಯ ಗುಣ ಅಜಪೇಳಲಾಯೆಂಬ

ಒಮ್ಮೆ ನಾರದ ಪಾಡೆ ತತ್ಥೈಯೆಂಬ

ಒಮ್ಮೆ ರಾಣಿಗೆ ಪೇಳಿ ಶಿರವನೊಲಿದಾಡುವ

ಒಮ್ಮೆ ತನ್ನೊಳು ನೆನೆಸಿ ರಾಮ ರಾಮ ಎಂಬ||೬||

ಅರಸಂಜೆಯ ಕಂಜ ಪುಂಜಗಳಲಿಪ್ಪ

ಅರೆ ಮುಚ್ಚಿದ ಹದಿನೈದು ನೇತ್ರಗಳಿಂದ

ಹರಿಯ ಕೊಂಡಾಡುತ ಪಂಚ ಮುಖಗಳಿಂದ

ಸಿರಿಕೃಷ್ಣ ಮುಕುಂದ ರಾಮ ರಾಮ ಎಂಬ||೭|| 

sOmashEkhara taane balla shrI-

raamanaamaamRuta saviyanella||pa||

madanapita eMdu kuNikuNidaaDalu

kedarida keMjeDegaLa puMjadi

odagida gaMge tuMturu hanigaLa kaMDu

padumajaaMDahita raamaraama eMba|1||

aanaMda jalada sOnege lalaaTada

nEtra baDabaanalanaMtire

Enennalibahudu sukha saagaradoLu

taaneddu muLuguta raama raama eMba||2||

shirada gaMgeya vara aggaNiyaagire

sarasija baaMdhava cheMdira dIpa

urigaNNina hoge dhUpavanErisi

karaNave naivEdyayeMdu raamaraama eMba||3||

chaMdada sphaTikada karaDigeyallippa

iMdranIlada chennaputthaLiyaMte

chaMdadi tannaya hRudaya madhyadi raama-

chaMdra hoLeye shrIraamaraama eMba||4||

aidu mukhagaLiMda hariya koMDaaDalu

swaadhIna bhUShaNa phaNigaLella

mOdadiMdaaDalu phaNi maNiyaaghaata

naada taaLavaage raama raama eMba||5||

omme hariya guNa ajapELalaayeMba

omme naarada paaDe tatthaiyeMba

omme raaNige pELi shiravanolidaaDuva

omme tannoLu nenesi raama raama eMba||6||

arasaMjeya kaMja puMjagaLalippa

are muchchida hadinaidu nEtragaLiMda

hariya koMDaaDuta paMcha mukhagaLiMda

sirikRuShNa mukuMda raama raama eMba||7||