ಯಾತಕಯ್ಯ ತೀರ್ಥಕ್ಷೇತ್ರಗಳು
ಶ್ರೀ ತುಲಸಿಯ ಸೇವಿಪ ಸುಜನರಿಗೆ ||ಪ||
ಅಮೃತವ ಕೊಡುವ ಹರುಷದೊಳಿರ್ದ
ಕಮಲೆಯರಸನಕ್ಷಿಗಳಿಂದ
ಪ್ರಮೋದಾಶ್ರು ಸುರಿಯೆ ಕ್ಷೀರಾಬ್ಧಿಯೊಳು
ಆ ಮಹಾತುಲಸಿ ಅಂದುದಿಸಿದಳು ||೧||
ಪರಿಮಳಿಸುವ ಮಾಲೆಯ ನೆವದಿ
ಹರಿಯುದರದಲ್ಲಿ ಸಿರಿಯೊಲಿಹಳು
ತರುಣಿ ತುಲಸಿ ತಪ್ಪದೆಯವನ
ಚರಣವ ರಮೆ ಭಜಿಸೆ ಭಜಿಪಳು ||೨||
ಪೂಜಿಸುವರ ಶಿರದಿ ನಿರ್ಮಾಲ್ಯಗಳ
ವ್ಯಾಜದಿಂದ ಲಕ್ಷ್ಮಿಯ ಕೂಡೆ ಬಹಳು
ಈ ಜಗದೊಳು ತಾವಿಬ್ಬರಿದ್ದಲ್ಲಿ
ಆ ಜನಾರ್ದನನಾಕ್ಷಣ ತಹಳು ||೩||
ಒಂದು ಪ್ರದಕ್ಷಿಣವನು ಮಾಡಿದವರ
ಹೊಂದಿಪ್ಪುದು ಭೂಪ್ರದಕ್ಷಿಣ ಪುಣ್ಯ
ಎಂದೆಂದಿವಳ ಸೇವಿಸುವ ನರರಿಗೆ
ಇಂದಿರೆಯರಸ ಕೈವಲ್ಯವೀವ ||೪||
ತುಲಸಿಯ ನೆಟ್ಟವನು ಮತ್ತೆ ತನಗೆ
ಇಳೆಯೊಳು ಪುಟ್ಟುವ ವಾರ್ತೆಯ ಕಳೆವ
ಜಲವೆರೆದು ಬೆಳೆಸಿದ ಮನುಜರ
ಕುಲದವರ ಬೆಳೆಸು ವೈಕುಂಠದಲ್ಲಿ ||೫||
ತುಲಸಿಯೆ ನಿನ್ನ ಪೋಲುವರಾರು
ಮೂಲದಲ್ಲಿ ಸರ್ವತೀರ್ಥಂಗಳಿಹವು
ದಳದಲ್ಲಿ ದೇವರ್ಕಳ ಸನ್ನಿಧಾನ
ಚೆಲುವಾಗ್ರದಿ ಸಕಲ ವೇದಗಳು ||೬||
ತುಲಸಿ ಮಂಜರಿಯೆ ಬೇಕಚ್ಯುತಂಗೆ
ದಳಮಾತ್ರ ದೊರಕಲು ಸಾಕವಗೆ
ಸಲುವುದು ಕಾಷ್ಠಮೂಲ ಮೃತ್ತಿಕೆಯು
ಫಲವೀವನಿವಳ ಪೆಸರ್ಗೊಳಲು ||೭||
ಕೊರಳಲ್ಲಿ ಸರ ಜಪಸರಗಳನ್ನು
ವರ ತುಲಸಿಯ ಮಣಿಯಿಂದ ಮಾಡಿ
ಗುರುಮಂತ್ರವ ಜಪಿಸುವ ನರರು
ಹರಿಶರಣರ ಕಲೆಗೆ ಸಾರುವರು ||೮||
ಎಲ್ಲಿ ತುಲಸಿಯ ಬನದಲ್ಲಿ ಲಕ್ಷುಮೀ -
ವಲ್ಲಭನು ಸರ್ವಸನ್ನಿಹಿತನಾಗಿ
ನೆಲೆಸಿಹನಿವಳೆಸಳೊಂದಿಲ್ಲದಿರೆ
ಸಲ್ಲದವಂಗನ್ಯಕುಸುಮದ ಪೂಜೆ ||೯||
ಎಲ್ಲ ಪಾಪಂಗಳೊಮ್ಮೊಮ್ಮೆ ಕೈಮುಗಿಯೆ
ಎಲ್ಲಿ ಪೋಪುದು ದೇಶದೇಶಂಗಳಿಗೆ
ನೆಲ್ಲಿ ಮಲ್ಲಿಗೆ ಮೊದಲಾದ ಸೈನ್ಯ
ಅಲ್ಲೀಗಲು ನಮ್ಮ ಬನದಲೊಪ್ಪಿಹಳು ||೧೦||
ಹರಿಪಾದಕೆ ಶ್ರೀ ತುಲಸಿಯೇರಿಸಿದ
ನರರನು ಪರಮಪದಕೇರಿಸುವುದು
ನಿರುತದಿ ತುಲಸಿಯ ಕಂಡರವಗೆ
ನರಕಗಳ ದರುಶನ ಮತ್ತಿಲ್ಲ ||೧೧||
ಧನ್ಯ ತುಲಸಿಯ ದಳವಿಟ್ಟು ತೂಗೆ
ಮುನ್ನ ಕೃಷ್ಣಗೆ ಪಡಿ ಆಯಿತು ಗಡ
ಇನ್ನಿವಳ ವೃಂದಾನದಲ್ಲಿ ನಟ್ಟು
ಮನೆ ಮನೆ ಮನ್ನಿಸದವನ್ಯಾವ ||೧೨||
ಕನಸಿನಲಿ ಕಂಡಂತೆ ಇನ್ನೊಂದು
ಕೊನೆವೆರಸಿದ ಪುಷ್ಪದಿ ಜಪಿಸಿ
ಅನುದಿನ ಹಯವದನನ್ನ ತೀರ್ಥ-
ವನು ಕೊಂಡು ನಾ ಧನ್ಯನಾದೆನು ||೧೩||
yaatakayya tIrthakShEtragaLu
SrI tulasiya sEvipa sujanarige ||pa||
amRutava koDuva haruShadoLirda
kamaleyarasanakShigaLiMda
pramOdaashru suriye kShIraabdhiyoLu
A mahaatulasi aMdudisidaLu ||1||
parimaLisuva maaleya nevadi
hariyudaradalli siriyolihaLu
taruNi tulasi tappadeyavana
caraNava rame bhajise bhajipaLu ||2||
pUjisuvara Siradi nirmaalyagaLa
vyaajadiMda lakShmiya kUDe bahaLu
I jagadoLu taavibbariddalli
A janaardananaakShaNa tahaLu ||3||
oMdu pradakShiNavanu maaDidavara
hoMdippudu bhUpradakShiNa puNya
eMdeMdivaLa sEvisuva nararige
iMdireyarasa kaivalyavIva ||4||
tulasiya neTTavanu matte tanage
iLeyoLu puTTuva vaarteya kaLeva
jalaveredu beLesida manujara
kuladavara beLesu vaikuMThadalli ||5||
tulasiye ninna pOluvaraaru
mUladalli sarvatIrthaMgaLihavu
daLadalli dEvarkaLa sannidhaana
celuvaagradi sakala vEdagaLu ||6||
tulasi maMjariye bEkacyutaMge
daLamaatra dorakalu saakavage
saluvudu kaaShThamUla mRuttikeyu
phalavIvanivaLa pesargoLalu ||7||
koraLalli sara japasaragaLannu
vara tulasiya maNiyiMda maaDi
gurumaMtrava japisuva nararu
hariSaraNara kalege saaruvaru ||8||
elli tulasiya banadalli lakShumI -
vallabhanu sarvasannihitanaagi
nelesihanivaLesaLoMdilladire
salladavaMganyakusumada pUje ||9||
ella paapaMgaLommomme kaimugiye
elli pOpudu dESadESaMgaLige
nelli mallige modalaada sainya
allIgalu namma banadaloppihaLu ||10||
haripaadake SrI tulasiYErisida
nararanu paramapadakErisuvudu
nirutadi tulasiya kaMDaravage
narakagaLa daruSana mattilla ||11||
dhanya tulasiya daLaviTTu tUge
munna kRuShNage paDi Ayitu gaDa
innivaLa vRuMdaanadalli naTTu
mane mane mannisadavanyaava ||12||
kanasinali kaMDaMte innoMdu
koneverasida puShpadi japisi
anudina hayavadananna tIrtha-
vanu koMDu naa dhanyanaadenu ||13||
